– Billettautomatane til NSB kan få eldre og funksjonshemma til å føla seg dumme og utilpass.

 

Det meiner Hans Merkesdal (Frp) i rådet for funksjonshemma i Eigersund. Han vil ta saka opp med konsulenten for universell utforming i NSB.

– Eg måtte hjelpa mor mi med å kjøpa billett på automaten. Ho har passert 80 og greidde ikkje å kjøpa billett sjølv, fortel han. Han har òg tenkt på koss blinde og svaksynte skal greia seg.

PÅ TOGET: Då han skulle hjelpa mora si, fekk han opplyst at honnørbillettar kan kjøpast på toget utan tillegg i prisen. Pensjonistar må altså ikkje ut med 20 kroner ekstra dersom dei ikkje vågar seg bort til billettautomaten, slik andre reisande må. Merkesdal synest dette er veldig bra, men han skulle ønskt det var eit skilt som sa noko om dette på stasjonen.

– Det burde vore tavler med skikkeleg informasjon, meiner han.

UTRIVELEG: Hans Merkesdal jobbar i Nordsjøen, og tar toget når han skal til og frå jobb. Spesielt synest han det er utriveleg å stå og fikla med automaten på perrongen på Sandnes – der han må stå ute i all slags vêr.

– Det hender rett som det er at automaten ikkje verkar. Då må eg ut med 20 kroner ekstra, fortel Merkesdal. Han synest i det heile tatt at automatane er eit problem.

IKKJE SPURT: Merkesdal ønskjer òg svar på kvifor ikkje rådet for funksjonshemma fekk uttala seg då NSB bestemde seg for å setja automatane opp.

Han har laga eit utkast til eit brev, som skal sendast NSB etter at saka har vore behandla i rådet for funksjonshemma.

 

Har blitt betre

– Me har endra litt på automatane, slik at dei nå skal vera lettare å bruka for dei som ser litt. Dei som ser for lite til å bruka automatane, får kjøpa billett om bord utan tillegg i prisen, på same måte som pensjonistar og andre som løyser honnørbillett. Det seier Åge-Christoffer Lundeby, som er informasjonssjef i NSB.

– Burde dette vore kommunisert betre til dei det gjeld?

– Me synest me har vore tydelege i kontakten med brukargruppene. Men me må vera opne for å bli flinkare og sjå på kva me kan gjera betre, seier Lundeby. Han understrekar at NSB ikkje ønskjer at nokon skal føla seg dumme eller tilsidesette.

– Det er derfor me har ein eigen konsulent for universell utforming, som ei av ganske få bedrifter, seier han.

Billettautomatane blei forbetra i desember.

Kommentarer (0)

RSS for kommentarer

Skriv kommentar

Vis/ skjul kommentarformular

E-post Navn		Tittel Kommenter mindre tekstfelt | større tekstfelt
		Jeg har lest og aksepterer Betingelser for bruk. Legg inn kommentar Preview