– Bli med på kuslepp!

Graset er kanskje ikkje grønare på andre sida, men det er definitivt grønare ute i det fri enn når det blir servert som silofôr. Onsdag kan alle som har lyst, få vera med og sjå kor glade kyrne blir for årets første munnfull av friskt og saftig grønt gras.

DEL

Brigt og Bente Gro Slettebø hadde eigentleg tenkt å sleppa kyrne sine på beite før 17. mai. Men dei låge temperaturane gjorde at grasveksten stoppa litt opp. Dermed blei den årlege spenstige kudansen utsett ei veke.

I år som i fjor vil bøndene på Slettebø gjerne dela denne gilde delen av våronna med andre, ikkje minst med folk som kanskje ikkje er så vande med rutinane og årshjulet på ein gard. I samarbeid med Dalane Friluftsråd arrangerer dei friluftskveld i forbindelse med kusleppet og håper på minst like mange og like begeistra deltakarar som i fjor, like godt vêr og like glade kyr.


Vil gjenta suksessen

- Kusleppet i fjor blei ein stor suksess. Derfor er det ingen grunn til å endra noko særleg på opplegget, meiner Egil Mong i Dalane Friluftsråd.

Han fortel at kyrne vil bli sleppte ut av fjoset heime på tunet på Slettebø for så å bli jaga eit lite stykke på fylkesvegen og deretter innover ein grusveg mot Laksesvelafjellet.

- Det er cirka eit par kilometer å gå, opplyser han.

Alle skal få

Når kyrne er framme ved sitt matfat, blir det servering også for dei tobeinte.

- Framme ved sommarbeitet byr me på kaffi og nysteikte lappar frå bålpanna, lover Egil Mong.

Bente Gro M. Slettebø synest det er flott å få gardsbesøk i anledning kusleppet.

– I bondelaget ønskjer me å leggja til rette for at fleire skal få innblikk i kva landbruket er og betyr i Bjerkreim. Samarbeidet med friluftsrådet er i så måte heilt perfekt. Her får folk oppleva den dagen som kanskje er den aller gildaste i året for ein bonde, dagen då flokken skal følgjast til sommarbeite. Sjølvsagt er me òg glade for spørsmål ein slik dag. Me håper dette er ein vinn-vinn-dag for oss og dei som kjem, seier ho.

Artikkeltags