For åttande gong drar Jane Vatland Øvstebø i gang julemesse i Sokndal. Denne gongen har 39 utstillarar meldt seg på. Dei skal selja handarbeid, mat og snop, for å nemna noko.
– Opplegget er likt frå år til år. Nokon fell frå, men me får stadig nye utstillarar, seier initiativtakaren.
I fjor var det ikkje julemesse – på grunn av koronapandemien. Det blei ei vårmesse i staden. Jane Vatland Øvstebø ser ikkje vekk at det blir begge delar framover; både julemesse og vårmesse.
Snop og handarbeid
Benedikte Johansen Bergum har vore med som utstillar fleire gonger. Ho lagar heimelaga julesnop, og i år har ho laga juleflesk, snickerskonfekt, havrekjeks, risbollar og peppermyntesnop. Ho har laga skumbollar òg, men dei har ho fått hjelp av mora til å laga. Mora hennar stiller òg på stand på julemessa; ho skal selja varer frå homepartyfirmaet Perfect Home.
Ingrid Urdal Støle lagar tasker, syr og heklar. Ho har med seg ei rekkje produkt til messa, slik ho pleier. Englane ho heklar, sel ho til inntekt for eit godt formål. Eitt år hekla ho så mange som 300 englar, og ho fekk inn 10.000 til ei god sak. Dette året har ho ikkje med seg fullt så mange englar, men ho kan fortelja at inntektene frå englesalet dette året går til Ukraina.
Pengar til busstur
Elevar frå niande trinn skal selja mat. Inntektene går til turen dei skal på til våren. Då reiser dei til Tyskland og Polen med Hvite Busser.
– Det er veldig bra å ha denne anledninga til å tena pengar til turen. Og det er godt for elevane at dei må trø til litt, seier Merethe Skåland, som er mor til ein niandeklassing som skal på tur.