Gå til sidens hovedinnhold

Parkeringskaoset på Espeland: Nabo Øyvind Espeland tilbyr plass til 20-30 bilar

Har du tenkt deg til Fossbrekka og Lanes til helga, treng du ikkje frykta tilsvarande parkeringskaos som sist helg.

For abonnenter

Det var i finvêret sist sundag at "alle" skulle til Fossbrekka og Lanes ved Maudalsvatnet. Dermed oppstod det kaotiske tilstandar på Espeland, der turgåarane parkerer når dei skal gå innover langs Storåna. Grunneigar Torbjørn Espeland blei så frustrert over ulovleg parkerte bilar som til dels stengde innkjørselen til gardsrommet hans, at han valde å sperra bilane inne med to traktorar.

I ettertid uttalte både representantar for Bjerkreim kommune og leiar Per Frode Sandal i Dalane friluftsråd til Dalane Tidende at situasjonen var svært uheldig, og at betre parkeringskapasitet måtte ordnast, eventuelt på ein annan plass.

Ringde inn ei løysing

Dei trong ikkje arbeida verken lenge eller hardt for å finna ei løysing på problemet. Onsdag kontakta nemleg Øyvind Espeland, som er nabo med Torbjørn Espeland, Bjerkreim kommune. Han tilbyr parkeringsareal like nedanfor huset sitt på ei romsleg, oppgrusa lomme ved fylkesveg 503.

- Her vil det vera plass til 20-30 bilar. Øyvind vil be om Vipps-betaling av 50 kroner per bil, og det har han sjølvsagt full rett til. Me hadde ikkje rokke å spørja han om parkeringsareal før han ringde sjølv. Dette er heilt strålande, seier Annette Olden Nedrebø på kulturkontoret i Bjerkreim.

Ho opplyser at Dalane friluftsråd skal ordna med skilting, og at det nye parkeringsarealet hjå Øyvind Espeland vil vera klart til bruk alt komande helg.

Gale i påsken, verre på sundag

Øyvind Espeland seier til Dalane Tidende at han har observert parkeringsproblemet over lengre tid. Det var ille i påsken, men toppa seg på sundag.

- Eg ringde politiet på sundag, men dei kom ikkje. Me skal vera glade for at det ikkje var brann på Veen den dagen, for brannbilane ville hatt problem med å koma fram, seier han.

Området kor han nå tilbyr parkering, blei oppgrusa i 2017 då fylkesveg 45 var stengt på grunn av rassikringsarbeid i Dirdal, og fylkesveg 503 forbi Espeland var omkjøringsveg.

- Me kjøpte eit lite gatekjøkken som me hadde ståande på denne grusplassen sommaren 2017. Pengar tente me ikkje, men tre-fire ungdommar fekk seg iallfall sommarjobb. I seinare tid har folk begynt å parkera her litt. I påsken sette eg opp ein lapp med beskjed om at eg ønskte at dei som parkerte, vippsa meg 50 kroner. Det er ikkje så viktig med pengane, men me får litt arbeid med planering og plukking av søppel, og dei fleste vil nok synast at det er betre å betala 50 kroner for å stå lovleg parkert, enn å ta seg til rette. Eg ser at den enorme trafikken av turfolk har kome brått på både kommunen og friluftsrådet. For å bidra til ei løysing som forhåpentlegvis vil gjera det både trivelegare og tryggare her på Espeland, ringde eg kommunen for å seia at dei kunne gå ut med at grusplassen hjå oss kan disponerast og skiltast som parkeringsplass for turgåarane, seier Øyvind Espeland.

- Nei, det er ikkje fritt fram

Om 20-30 ekstra parkeringsplassar ikkje er nok, har Espeland meir i ermet.

- Eg skal alltids klara å finna endå meir plass om det trengst. Det er jo gildt at folk vil gå på tur i nærområdet vårt.

Han seier at han forstår veldig godt naboen sin frustrasjon.

- Eg er einig med Torbjørn i at det er irriterande med folk som trur at "på landet", der er alt fritt. Sjølv har eg både opplevd at folk har parkert i gardsrommet, og at dei har slått opp telt på plenen min. Ein gong tok eg affære og stengde inne ein som hadde parkert i gardsrommet, med ein hjullastar. Før han fekk kjøra ut, bad eg om adressa hans. Då han spurde kva eg skulle med den, svarte eg at det alltid er greitt å vita kor ein kan parkera når ein er i Stavanger, og at eg rekna med det var i orden at eg kom og parkerte i gardsrommet hans. Men det var visst ikkje i orden, ler Øyvind Espeland.

Oppfordring til vegvesen og politi

Nå håper han at også andre vil bidra til ordna og trygge forhold på Espeland på store utfartsdagar.

- I helgene er det veldig mange motorsyklar som fer forbi her, og dei held slett ikkje alltid fartsgrensa på 60 kilometer i timen. Viss det står ei lang rekke med bilar langs vegen, og ungar spring ut og inn mellom bilane, skal det veldig lite til før det skjer ei stygg ulykke. Vegvesenet burde ha sett opp skilt som fortel at det er forbydt å parkera langs fylkesvegen, og politiet bør ta seg nokon turar av og til for å sjå at alt er i orden, lyder oppfordringa frå Espeland.

Les også

Friluftsrådet om parkering og tilgang til toppturar: - Det er blitt ei mykje større utfordring, og sosiale medium har litt av skulda