Laurdag går finalane i rogalandscupen (Obos-cupen) for ungdomslag av stabelen i Randaberg Arena. Eitt av finalelaga er G14-laget til Bjerkreim IL.
– Veldig kjekt at me har kome til finalen! Dette blir spennande, seier trenar Gustav Kjølberg, som har med seg Svein Gunnar Hetland som hjelpetrenar for BIL G14.
Laget som går på banen for å hindra bjerkreimsgutane i å bli cupmeistrar, er Ganddal. Skal me dømma ut frå resultata i dei siste seriekampane til Kjølberg og Hetland sine disiplar, skal sandnesgutane få litt å stri med på kunstgraset i storhallen på Randaberg. I haust har nemleg Bjerkreim vunne alle kampane sine i andredivisjon for G14.
– Det varierte ein del i vårsesongen, men i haust har det gått veldig bra. Ein del av kampane har vore jamne, men det har bikka vår veg kvar gong, seier Kjølberg.
Forventar tøff serieavslutning
Måndag er det serieavslutning borte mot Bogafjell. Viss BIL-gutane då fullfører sigersrekka, vil dei imponera trenaren sin stort.
– Me endar på tredjeplass uansett. Bogafjell er seriemeistrar viss dei klarer uavgjort mot oss. Dei har med andre ord mykje å spela for, så me kan venta oss ein tøff kamp, seier Gustav Kjølberg.
Fire årgangar på laget
Stammen i laget hans er 14-åringane, dei som er fødde i 2008. Men i ein liten klubb som Bjerkreim er det ofte ikkje nok fotballspelarar i eitt kull til å danna eit lag. G14-laget er ikkje noko unntak og har fått dispensasjon til å ha med nokre spelarar som er fødde i 2007. Dessutan er det éin på laget som er fødd i 2009, og éin som er fødd i 2010.
– Det er ein fin gjeng som er ei blanding av både ivrige og flinke spelarar. I år har me vore på både Cup No. 1 i Danmark og på Trollcup i Kristiansand. Å reisa på turnering i lag har ein positiv effekt på samhaldet og miljøet, seier trenar Gustav Kjølberg, som er far til to av gutane på laget.
Har du ikkje tenkt deg til Randaberg Arena på laurdag? Då kan du få med deg både BIL-gutane sin kamp og dei andre cupfinalane her på dalane-tidende.no