EIK Fotball melder tysdag kveld at 12 spelarar ikkje blir med klubben neste sesong. Verken Bob Sumareh, Kenneth Grande eller Mathias K. Perttamo speler i EIK-drakt i 2021.

Forståelege grunnar

Grande har 267 kampar for de gule og svarte. Perttamo har vore på banen i EIK-drakt i 339 kampar. Bubacarr Sumareh har spelt 97 kampar for klubben.

Grande skal leggja opp.

– Det var trist, men forståeleg, kommenterer EIK-trenar Ojan Bijan på nettsidene til EIK Fotball.

Perttamo har fulltidsjobb og har ifølgje EIK Fotball valt å trappa ned.

– Synd, men forståeleg, kommenterer Bijan.

Har gitt sine beste år

På spørsmål frå Dalane Tidende om det er usemje om kontrakten som gjer at Bob Sumareh ikkje er EIK-spelar neste år, svarer Bijan:

– Ting utviklar seg i fotballen. Av og til passar det at ein går kvar sin veg.

Han held fram:

– Det har aldri vore ei hemmelegheit at Bob har hatt andre moglegheiter enn å spela for EIK. Nå var tida inne for å skilja lag.

Trenaren veit ikkje kva planar måltjuven Sumareh har, men han ønskjer han lykke til vidare.

– Han har vore ein fantastisk spelar for oss. Han har gitt sine beste år til EIK, seier han.

For mange i stallen

Dei fleste av dei andre spelarane som ikkje blir med neste år, er unge spelarar med eittårskontrakt. Nokon har takka for seg på eige initiativ, mens andre har fått beskjed om at det ikkje er plass til dei i stallen neste år.

Ojan Bijan seier til Dalane Tidende at pandemien gjer sitt til å at stallen må reduserast. Denne sesongen har det vore 27 spelarar i A-lagstroppen. Så mange spelarar har ikkje EIK økonomi til å halda fram med å ha, understrekar han.

Dei ni andre som ikkje speler for EIK neste år er:

Adonis Brahimi

Sander Remme

Sander Grelland

Nicholas Grinde

Phillipe Koko

Mats Gramstad

Preben Skeie

Nicolai Larsen Berg

Herman Kleppa