I litt over fem år har Svein Anton Hansen frå Egersund laga radioandakter for Norea mediemisjon, andakter som er blitt kringkasta på dei kristne radiokanalane pTro og Radio 3,16.
Nå har han samla dei beste – og dei som ikkje er for lange – til ei andaktsbok. Tanken er at lesaren skal lesa ei andakt kvar dag.
Andakter frå vaskerommet
Svein Anton Hansen tar utgangspunkt i kvardagslege hendingar når han skriv andakter.
– Det kan vera noko eg sjølv har opplevd, noko eg har sett på tv eller noko eg har lese i ei avis. Historien er ikkje sjølve poenget, men ein innfallsvinkel til den åndelege bodskapen. Det høyrer eit bibelvers med til kvar andakt, forklarer han.
Når han jobbar for Norea mediemisjon, jobbar Svein Anton Hansen frå heimekontoret. Han bruker vaskerommet som lydstudio. Det er så godt som lydtett.
– Eg pleier å vitsa med at det iallfall blir reine andakter, ler han.
Egersundaren jobbar òg som pastor og forsamlingsleiar i Misjonssalen i Sandnes, som høyrer til Norsk Luthersk Misjonssamband. Han styrer arbeidstida si så å seia sjølv, både i Misjonssalen og i Norea mediemisjon.
– Som pastor jobbar eg mykje i helger og på kveldar. Då kan eg bruka kvardagane til andaktsskriving, forklarer han.
Opphavleg trøndar
Svein Anton Hansen er opphavleg frå Trøndelag, men han har budd i Egersund, der kona er frå, i 25 år. Kona møtte han på Fjellhaug i Oslo, då dei begge gjekk på skule der.
– Så blei det til at me flytta hit. Det er eg godt fornøgd med. Eg trivest veldig godt, og synest Egersund er ein utruleg fin by.
Han held fram:
– Og det meiner eg frå hjartet. Det er Egersund som er heime for meg nå.
Før han begynte i Norea mediemisjon, kombinerte Svein Anton Hansen pastorjobben i Sandnes med å jobba som sekretær på kyrkjekontoret i Egersund.
Gruvehistorie: Derfor blei det aldri storstreik på Titania
