Victoria Lorentzen i Sokndal blei nyleg trekt ut som vinnar i Returkartonglotteriet. Ho vann 10.000 kroner.

Enkelt å sortera

Victoria har delteke i lotteriet sidan 2016. Ho meiner det er miljøet som er den verkelege vinnaren.

– Det er jo så enkelt å sortera, og miljøet tener på all sortering.

Kartongen til Victoria blei samla inn av Dalane Miljøverk, som er ansvarleg for innsamlingsordningane i Bjerkreim, Eigersund og Sokndal.

– Dette er heilt klart ein hyggeleg del av jobben. Både organisasjonar, bedrifter og privatpersonar som er flinke til å sortera og levera inn kartongane sine, kan bli påskjønna for miljøinnsatsen, seier Kariann Halstensen frå Dalane Miljøverk AS.

Namn og nummer

I fjor vann tre dalbuar premie i Returkartonglotteriet, som har eksistert sidan 1997. Det blir trekt ut 124 vinnarar kvart år.

For å vera med i Returkartonglotteriet må ein skriva namn og nummer på kartongen før han går til kjeldesortering. Ein kan laga seg ein kubbe med kartongar, men det går òg an å levera frå seg enkeltkartongar med namn på. Både privatpersonar og lag og foreiningar kan delta. Ein kan vinna 10.000 og 100.000 kroner.

Drikkekartongane som blir samla inn, blir pressa til ballar og selde til papirfabrikkar.